Nco Zoo Zoo Cia Txoj Kev Hlub Tau tsim Dhau los

Txhua Yam yog vim kev Hlub, Kuv thiaj li yog tus neeg uas kuv niaj hnub yog, Vim kev hlub, kuv thiaj li Zoo li no

Paj Huam

TSIS PLOJ / Hlikaj Yaj

Posted by hli on April 15, 2012 at 9:30 PM Comments comments (0)

Txoj kev hlub wb tsim muaj los

Lub caij nyoog sij hawm tsis tos

Txhua hnub kuv tau nyob tuav ze

Txhua hmo kuv tau hu koj npe


Hnub no kuv tsuas sawv ib leeg 

Twb tau hlub koj tag kuv zeeg

Kev nkauj nraug zoo ua luaj no

Es lub siab yuav ua cas tso


Kuv rov mus txog thaj chaw qub

Tau cog cia rau txoj kev hlub

Thaj chaw nim nyob phob xuab cia

Mob siab npaum twg tsis hais qhia


Tus hneev taw uas wb tau tsuj

Thaj chaw wb tau pw ntsia ntuj

Txij hnub no tsis muaj ntxiv mus

Lub hlwb cim cia wb tej lus


Lub xub ntiag kuv ib txwm pw

Tu ntxhiab kuv ib txwm hnov tsw

Hnub no yaj mus ua luag li

Tseg kuv ib leeg nyob tsaus nti


Txawm hnub no kuv tsis muaj koj

Koj tseem nyob hauv siab tsis ploj

Mob tshuav siav los tsuav tsis tuag

Lam mus ua lub neej nrog luag


Txoj kev hlub ntawm wb ob leeg

Hnub no dhau mus ua dab neeg

Cia kuv khaws cia hauv nruab plawv 

Muaj tub ki mam piav rau lawv


Yog txoj sia tseem tsis tau tu

Koj lub npe kuv tseem tos hu

Vim kuv lub siab tsuas yog muaj koj

Ntev npaum twg koj yeej tsis ploj


Yog Tsis Muaj Kuv / Hlikaj Yaj

Posted by hli on April 15, 2012 at 9:20 PM Comments comments (1)

Tsawg hnub tsawg hli koj ua siab luv

Xav kom ntiaj teb no txhob muaj kuv

Ua phem npaum twg kuv nyob ciaj uv

Vim ntses pheej dhia koj thiaj lam nuv

Hnub no koj noj tag zoo tsis yuav

Cem tias yog tus koj niaj hnub dhuav

Yog paub thaum ntxov ntshe twb tso plhuav

Tabsis vim twb tau koj lawm neb

Kuv thiaj tsis muaj lub siab khiav deb

Thaum ua tau ib pluag hu koj noj

Koj cem tias xav noj, koj noj koj

Txawm mob npaum twg kuv ua siab loj

Mab mam rub lub pob zeb nce toj

Tabsis yog ib hnub to qab ntawm lub kawm

Hnub ncaim tawm ntawm kev txij nkawm

Hnub tsis muaj kuv nyob ntawm no lawm

Leej twg thiaj yog tus los mus tuas

Koj txoj mi kev ntxub thiab kev dhuav

Ntshe yuav nyob tus kho siab li khuav

Leej twg thiaj li yuav ua tau lub siab ntev

Thaum koj tsuj ntiab cuag li tus dev

Qhov tseeb tiag leej twg los yeej tsis xav thev

Ntshe twb khiav mus yim cuaj kaum txoj mi kev

Vim kuv twb lees lus puag thaum los nyob

Hais tias yuav thaiv tsis cia koj mob

Yuav muaj ib xwb tsis muaj ob

Txawm koj tsim kuv npaum twg los kuv thiaj hlub

Vim saib koj muaj nqis tshaj saw nyiaj saw kub

Luag leej ntxhais Hmoob / Hlikaj Yaj

Posted by hli on April 15, 2012 at 9:10 PM Comments comments (1)

Niam txiv yug ua ntxhais nkauj hmoob

Tsev neeg kuj tsis tsawg tsis coob

Tus mi neeg tsis loj tsis siab

Cwj pwm coj tsis tus tsis kiag

Muaj lub siab xaiv lo lus zoo

Tau lub neej tsis paub txoj hmoo

Nyiam nraug hmoob xav ua tus hlub

Xav kom yog txij nkawm ib khub

Los ntshe lawv yuav xaiv daim tawv

Lawv tsis nco xaiv tuaj nruab plawv

Nyiam nyiam los ntshe txeeb tsis tau

Muab kev ntshaw coj los mus sau

Tsis nyiam coj tus kheej mus khav

Nplooj siab mob faus tuag nruab av

Yug los ua luag leej ntxhais hmoob

Xav nce siab los ntshai tsam poob

Txiv leej tub puas yuav los pab

Hlub leej ntxhais rub ua nws nyam

Coj leej ntxhais mus txhua txoj kev 

Mus ua nws ib leeg zoo sev

Yuav cog lus kom tseeb tiag cia

Hlub leej tub kom tag txoj sia

Yuav cog lus ciaj ob peb zag

Hlub txoj hnub hiav txwv qhuav tag

Thiaj tsim nyog ntxhais hmoob yug los

Ntev npaum twg mam li nyob tos.

Yuav ntev npaum twg kuv mam hnov qab koj/ Hlikaj & Xeeb pov

Posted by hli on April 5, 2012 at 7:20 PM Comments comments (1)

Ntev npaum twg mam hnov qab koj

Kuv xav zoj tias ua ib siab

Tawm xyoo tshiab mam txhob nco lawm

... Mam li tawm mus nrhiav lwm tus

Los lo lus tshuas hais tau xwb

Lub siab twb tsis kheev tsis kam

Kaus loo pam pw tsis tsaug zog

Vim xav txog koj tas mus li

Nco thaum i wb tseem sib hlub

Wb niaj hnub taug kev ua si

Tham luag ntxhi txhua hnub txhua hmo

Tav li no los nws tsis ploj

Kuv xav zoj tias twb dua lawm

Lub sij hawm twb tau dhau mus

los tej lus wb tau hais cia

Haj tseem ntsia chob hauv kuv siab

Ua tshuaj iab txhua zaus tseem qaug

Rov mus taug wb tej chaw qub

Tsis muaj hnub yuav rov tau nyob

Kuv siab mob ntxhov zooj zem zuag

Qhov tsis tuag yog sia lawm xwb

Txawm koj twb hnov qab txog kuv

Muab luag xuv pauv kuv thaj chaw

Los tseem kaw zoo hauv kuv hlwb

Puag thaum wb tseem nyob ua ke

Zaum no ntshe yuav tuag kiag los

Siab tseem tos tseem hlub tshua koj

Lub ntuj loj kev los kuj dav

Txoj kev xav nws txawv lub siab

Tsawg hnub thiab hli txawm yuav dhau

Tshem tsis tau koj hauv kuv siab

Hnub twg thiab mam hnov qab koj os nplooj siab...

 

 

Kuv love koj

Posted by hli on March 7, 2012 at 2:40 PM Comments comments (1)

I love you es koj puas paub

Puas tob taub koj puas nkag siab

Tseem tshuav thiab lo I miss you

Koj coj mus ua tib zoo xav

Kom dav dav thiab kom txhua txhua

Rov los dua kuv mam li txhais

 Hais tias I yeej like like you

You yog tus I twb ntshaw ntshaw

Muab txoj saw muab koj daim duab

Coj los npuab rau ntawm coj dab

Ntshe raug dab lawm pob kuv na

Los thov tsa tes rau lub ntuj

Thaum siab yuj li plaws rau koj

Hais vwm zoj tej mi lus nco

 Cas yuav kho lub siab luaj ne

Yog nyob ze yuav rub puag kiag

Vim pheej nyiag kuv lub siab laub

 Koj puas paub I crazy heev

 Niaj hnub seev txog koj tasli

Siab quaj dhi tias I miss dhau

Yog ua tau es muaj txoj hmoo

 Yuav ya loo tuaj tuav koj tes

Thiab yuav say Love you a lot

Love too much I twb yuav tuag

Thaum koj luag my heart melt tag

Tsis tau dag tsuas hais qhov tseeb

Neeg yaj ceeb tus neeg ntxim hlub

Thov you pub I love you nawb

Txawm tsis dawb los twb tseem ntshiab

Thov love thiab miss you ib txhis

You and me together mus

I cov lus I hais rau koj

Yog txhais loj tshaj cov ntsiab lus

 I love you and miss you only xwb My love.

(hehe... Sau ua kev lomzem rau txhua tus)

Tus mi nraug hmoob

Posted by hli on March 5, 2012 at 6:30 PM Comments comments (2)

Mi nraug hmoob tus neeg zoo nraug

Pom ib zaug vwm lawm ntau xyoo

Hais lus zoo lub suab luag ntxhi

Zoo cuag li tus mi nraug suav

Tsis yog cuav nyob kiag ntawm no

Hnav tsoos tsho cob xub dua ntais

Tswv yim zais ntse rau nruab siab

Ua nkauj Iab nkauj fa vwm tag

Nyiam tso dag seev suab ua si

Tuaj rub khi niam leej ntxhais no

Siab ya hlo tuaj mus nrhiav raws

Siab yuj plaws tuaj mus nrhiav hlub

Txiv leej tub tus neeg dai siab

Tus kiab kiab coj tau tus tus

Tus mi lus zoo ntxim luag plawv

Xav ntsaub rawv ntawm koj ib sab

Tuav loo npab hais lo lus zoo

Puas muaj hmoo tau nyob ze ze

Tau tuav npe yog tus koj hlub

Nyob koj xub ntiag li kev xav

Nrog luag nyav koom ib tes tsho

Yuav tso nrho lub neej txoj sia

Rau khaws cia koj ib leeg li

Tsis tau ci pob zeb rau zov

Mam rub khov koj npe koj koob

Mi nraug hmoob leej twg tej tug

Niam txiv yug ntxim siab ua luaj

Ntshe kawg quaj yog tias tsis tau

Txhob siab ntau nawb txiv leej tub

Txoj kev hlub thiaj yuav kav ntev

Xaiv zoo sev xaiv zoo txiv nkawm

Ces xaiv ntawm lub siab lub plawv

Daim mi tawv tsuas zoo ib muag

Thaum yus tuag yus nqa tsis tau

Zoo siab dhau tau ntsib ib zaug

Ntshe yuav taug rawv txoj kev nyiam

Fav lwm tiam kom kuv zoo nkauj

Mam rov tauj mam thov kev hlub

Ntawm txiv leejtub tus neeg dai siab.....

Hmoo tau tso

Posted by hli on February 14, 2012 at 4:20 AM Comments comments (0)

Nkauj npauj npaim nyob tsis muaj tsev

Ntsib nraug seev nyob rau tog kev

Sib hlub mus yeej tsis kav ntev

Ntuj tsis cia mus ua nws sev

Nraug seev tuaj sab hnub poob tuaj

Hnov npauj npaim seev lub suab quaj

Cas suab seev kho siab ua luaj

Nraug seev thiaj lam lees txais nws

Luag ntxhawb ntxhi thaum hais sib xws

Sij hawm dhau mus lawm zuj zus

Hais tias hlub tsuas yog lo lus

Yog nyob nov puas muaj chaw mus

Twb tsis paub nws puas hlub yus

Hlub zem zuag zoo li npau suav

Tsis muaj hmoo tau koj tes tuav

Kev hub kev nco ntshe yuav tso plhuav

Hlub npaum twg los tsis tau dhuav

Los tsis muaj hnub yus yuav tau yuav

Thov koj khaws cia rau hauv siab

Ua ntej koj mus nrhiav tus tshiab

Tus neeg zoo nkauj tsuas zoo daim tawv

Kev hlub tiag nyob hauv nruab plawv

Tsis zoo ntsej muag nrhiav raws daim ntawv

Thiaj hlub txog hnub mus pw tsis sawv

Xav kom koj paub tias koj thiaj yog

Tus kuv hlub tag kuv lub zog

Tib tug kuv nco lawm xwb mog

Nkauj npauj npaim yeej tsis muaj tsev

Ntsib nraug seev nyob rau tog kev

Sib hlub mus thiaj tsis kav ntev

Los cim zoo cia nyob rau nruab cev


(Paj huam tshiab, kuv tsim los ntawm kev xav. :))

Ib hnub tseem ceeb

Posted by hli on February 14, 2012 at 1:10 AM Comments comments (0)

Puag thaum wb tsis tau sib ntsib

Xyoo tshiab pib yeej nyob ib leeg

Coob tug neeg twb muaj tus khub

Nqa khoom pub hais lus qabzib

Xyoo no pib kuv nrhiav tau koj

Tsis ua txoj hais lo lus zoo

Muaj rau xyoo no lawm tiag tiag

Thiaj li nyiag tuaj qhia rau koj 

Xav hais zoj, tsis zoo li qub

Valentine hnub twb yog hnub no

Thiaj nqa hlo lub paj rau koj

Thov koj coj nws mus khaws cia

Ns yuav qhia tias kuv hlub koj

Txhob muab coj pov thoob khiab nyiab

Mi nplooj siab kuv hlub koj xwb

Lub ntuj twb tso wb sib ntsib

Wb thiaj pib txoj kev sib hlub

Yuav tsis pub koj mus rau luag

Kuv yuav puag thiab kuv yuav hlub

Kom txog hnub tsis muaj wb os tus neeg kuv hlub as..

Siab Yeej Hlub

Posted by hli on January 13, 2012 at 2:35 AM Comments comments (2)
       
 
 
   
        We tested this page and blocked content that comes from potentially dangerous or suspicious sites. Allow this content only if you’re sure it comes from safe sites.      

Pom zem zuag nyob hauv npau suav

Ntsia tsis dhuav nws tus mi duab

Nws lub suab hais luag kheev tham

Ntshe kheev lam nws yog kuv tus

Kuv tej lus yuav tseg rau nws

Hais sib xws ntxim kuv lub siab

Txawm lub ntsiab yuav tsis qhia tawm

Tsis nco lawm los kuv tseem khaws

Siab yuj plaws tuaj mus nrhiav nws

Kua muag ntws xyov twb tsawg zaus

Luag tej laus hais los tsis xav

Hnov luag cav txoj kev hlub loj

Tsuas yog koj xwb tus kuv ntshaw

Cas ntuj caw wb los sib ntsib

Ntshe tiam ib wb yeej sib paub

Yog yawm saub tso ua txij nkawm

Yeej paub lawm, yog kev npau suav

Tsis tau tuav koj sab mi tes

Cuag tus ntses ntshaw tus dej ntshiab

Koj tus ntxiab yog kuv tau hnia

Yuav khaws cia zoo rau xub ntiag

qhia tiag tiag txoj sia yuav tu

koj sab plhu yog kuv tau hnia

Tag txoj sia kuv yeej yuav nco

Txawm lub tsho nws yuav ntuag tag

hais tsis dag siab tsis tau lwj

Tseem nyob tswj tos tus kuv hlub

Txawm tsawg hnub nws yuav tsis paub

Thov yawm saub tsuas nqa kev zoo

Nyob nto moo los rau nws xwb

Ces kuv twb zoo lub siab tshaj

Siab tsis kaj vim tsis tau nws

Los tsuas nws tau tus nws hlub

Thov tsuas pub kuv ib leeg mob

Kom nws txhob poob lub kua muag

txawm kuv tuag lawm los tseem nco

Vim hlub tag nrho kuv lub siab lawm tus neeg zoo.....

Zoo siab tau hlub nrog koj/ Hlikaj

Posted by hli on November 15, 2011 at 1:05 PM Comments comments (0)

Txij thaum kuv niam yug kuv los

Kuv tsuas tos seb puas muaj hnub

Txawm tshav kub los muaj ib tug

Nws tsuas yug los hlub kuv xwb


Ntau xyoo twb dhau mus lawm tiag

Lub xub ntiag tseem tsis tau tshw

Tus los pw tseem tsis tau muaj

Kuv thiaj tuaj kiag mus nrhiav seb


Nws nyob deb los yog nyob ze

Nws lub npe kuv puas tau hnov

Lub xeem xyov puas yuav txawv kuv

Kuv thiaj uv los txog hnub no


Tos kuv nco kuv nrhiav tau koj

Txawm kuv noj thiab kuv yuav pw

Los thov ntw cua xa zoo zoj

Hais qhia koj tias kuv nyiag hlub


Los koj pub lub chaw kuv nyob

Zoo tob tob hauv koj lub siab

Daim nplooj liab yeej xav tau dej

Pom luag tej muaj nyias tus hlub


Kuv mi khub zoo nkawm mi noog

Twb los yoog txog kiag rau koj

Kev hlub loj tshaj lub ntiaj teb

Ntxawm kev deb los kuv yuav hlub


Yuav tsis pub lub kua muag nrog

Kuv lub zog nws yuav tsis tag

Yuav tsis dag rau koj ib zaug

Tshaj ntau npaug ntawm kuv lub neej


Tias kuv yeej yuav hlub koj xwb

Es cia wb sib sau ua ke

Mam nyob ze ntawm koj ib sab

Tsis raug dab los yog qhaug cawv


Yuav hais rawv rau koj hais tias

Kuv tes txias los rov sov tuaj 

Yog vim muaj koj yog tus ib

Lus qabzib tshaj tsis muaj iab


Zoo kuv siab tau hlub nrog koj 

Kom wb txoj kev sib sib hlub

Tsis muaj hnub tawg zoo li iav

Wb mam piav rau wb me nyuam


Kom txhob ruam ntawv txoj kev hlub

Tsis muaj hnub kuv yuav ncaim koj

Vim kuv loj los ua ib tug

Los tsuas yug los hlub koj xwb


Zoo kuv siab tau hlub nrog koj os

Tus neeg Zoo.....